حوار مع مسئول
ببساطة .. يعني ايه إتاحة التعليم
أو
(ألوصول الشامل والمشاركة)
بقلم /سعيد صديق
وكيل وزارة التربية والتعليم والتعليم الفني سابقا
حوار مع مسئول
ولي الامر : ابني هيتم 4 سنوات في 1 / 10 عايز اقدم له في حضانة
المسئول : قدم علي الموقع عشان فيه تنسيق
ولي الامر : تنسيق للحضانة ليه هو جامعة
المسئول : مفيش أماكن تستوعب كل الأطفال اللي هيتموا 4 سنوات في 1 / 10 !
انت عارف كام طفل هيتم 4 سنوات في 1 / 10
كل الأطفال اللي اتولدوا من 4 سنوات عارف عددهم كام
ولي الامر : وانا اعرف منين هو انا الجهاز المركزي للتعبئة العامة والاحصاء ؟ كام يا سيدي ؟
المسئول : احنا في 2023 من اربع سنوات يعني مواليد عام 2019 من سجل الجهاز المركزي للتعبئة العامة والاحصاء نلاقي مواليد 2019 عددهم 2.4 مليون تقريباً شيل منهم الوفيات والهجرة بنسبة 25 % تقريباً يبقي الصافي 1.8 مليون طفل تقريباً
قسم بقي 1.8 مليون طفل علي 25 طفل في الفصل يبق المطلوب 72000 فصل
عندنا منهم ( تعليم حكومي – خاص – دولي – وخلافة ) حسب اخر إحصاء للوزارة في بداية العام الدراسي 41000
يبقي عجز الفصول في رياض الأطفال 31000 فصل عشان نقدر نستوعب كل صافي المواليد
عارف بقي الفصل الواحد بيتكلف كام حسب تقدير الهيئة العامة للابنية التعليمية ؟
بتكلف 1.5 مليون جنيه ( شامل الأساس ومتحمل تكلفة الفراغات الأخرى اللي هي غير فصول )
تبقي التكلفة 31000 فصل * 1.5 مليون جنيه = 46500000000 ( 47 مليار جنيه تقريباً )
لو ربعهم هيبقي فصول في مدارس خاصة ودولية يبقي احنا محتاجين 35 مليار عشان نبني فصول رياض أطفال تستوعب ابن حضرتك ويخل بدون تنسيق … دا احنا لم نحسب لهم تكلفة ( عجز المعلمات + تجهيز الفصول ) الموضوع كبير قوي صاحبي .. انت فاهمني
ولي الامر : لا طبعا مش فاهم .. انا تهت منك .. و مليش دعوة بالكلام دا والدستور بينص علي اتاحة التعليم للجميع دون تمييز
المسئول : تمام يا سيدي ياللي مذاكر الدستور
قانون التعليم بيقول سن التعليم الالزامي 6 سنوات عشان يدخل اولي ابتدائي ودا اللي الدستور بينص عليه ان ابنك لو تم 6 سنوات الدولة لازم تتيح له مكان يتعلم فيه ، وان شاء الله هنوفر لك المكان لما ابنك يتم 6 سنوات
ولي الامر : خلاص هقدم في التنسيق لرياض الأطفال
المسئول : تمام دا بيبقي للمدارس الرسمية لغات فقط ودي لها مصاريف تدفعها كل سنة عشان دا تعليم مميز
اوالرسمي الدولي او المدارس المصرية اليابانية اومدارس النيل ودي مصاريفها اعلي عشان متميزة اكثر
أو تقدم في مدرسة خاصة ( عربي او لغات او دولي ) انت قدراتك المالية أيه ؟
ولي الامر : انا لا عندي قدرات مالية .. ولا عايز مدارس لغات .. ولا هقدر علي مصاريف الخاص
المسئول : يبقي نشوفك بقي كمان سنتين ( ربنا يخللي لك اولادك ويبارك فيهم )
ولي الامر : علي فكرة اللي زي حالتي كدا كتير جدا في الريف والقري والمناطق الشعبية والمحافظات الفقيرة دا احنا كتر من 85 %
المسئول : ربنا يبارك فيكم وانتم اللي بيخرج منكم النماذج المشرفة اللي بيرفعوا اسم مصر عاليا
لو مش مصدقني ذاكر تاريخ مصر وشخصياتها
بإذن الله نلتقي في اشكال اخري من الاتاحة أو ( الوصول والمشاركة ) … ببساطة
