أسمح لي معالي محافظ ……..
بقلم /سعيد صديق
وكيل وزارة التربية والتعليم والتعليم الفني سابقا
أسمح لي معالي محافظ …….
بمناسبة إن باقي علي بداية الدراسة 15 يوم تقريباً
تسمح لي أدردش معاك من قلبي :
معاليك أكيد عندك خبر إن في خطة استراتيجية للتعليم قبل الجامعي 22 – 26، وان لها برامج تنفيذية تتضمن تحقيق اهداف تنفيذية تقاس بنسبة تحقيق مؤشرات أداء، لجهات التنفيذ اللي محافظة معاليك احد أهم جهات التنفيذ الأساسية في خطة التعليم قبل الجامعي
وان العام الدراسي القادم اللي هيبدأ بعد 15 يوم هيكون العام التاني من اعوام تنفيذ البرامج والخطة
أقترح علي معاليك تجتمع بمسئولي التعليم بالمحافظة ( عام – فني – ازهري ) ويعرضوا علي معاليك خطتهم المتكاملة في هذا الشأن ،
كدا العام الدراسي هيبدأ عند حضرتك وكل مسئولي التعليم بالمحافظة ( مدير المديرية – وكيل تعليم الازهر – مديري عموم الادرات التعليمية )، الكل مضطلع علي الخطة وعارف دوره في التنفيذ وعارف هيعمل ( ايه ، وازاي ، وامتي ، وفين ، وبكام ) وعشان يحقق ايه في الخطة التنفيذية في المحافظة اللي هي جزء أساسي من الخطة التنفيذية للعام الثانث من الخطة الاستراتيجية للتعليم قبل الجامعي في مصر 22 – 26 ).
و نجرب نعمل حلم للتنمية البشرية والاقتصادية في المحافظة ، لو محافظة معاليك فيها اثار أو شواطئ يبقي نركز علي التعليم الفني ( سياحة وفنادق ) ولو محافظة معاليك زراعية يبقي نركز علي التعليم الفني ( الزراعي ) ولو محافظة معاليك صناعية يبقي نركز علي التعليم الفني ( الصناعي )، وافرض بقي مفيش أي حاجة من دي يبقي نتكامل مع اقرب محافظة لينا فيها الخير دا ودرب لها ايدي عاملة ماهرة في المجال اللي هي محتاجة له وهكذا، ونحقق مقولة ان التعليم الفني هو قاطرة التنمية االبشرية والاقتصادية للبلد ويبقي حلمنا جزء من رؤية مصر 2030، وخطتنا لها اهداف استراتيجية بعيدة المدي، وسنوية و اللي هنبني فيها برامجنا التفيذية، وتكلفتها هتبقي موازنة برامج، وربط الاحلام ببعضها يبقي هو برنامج متكامل للحكومة.
علي فكرة دا سهل جدا تحقيقه :
لو كل الجهات المعنية يتجمعوا بقيادة السيد المحافظ علي طاولة واحدة ، ويدرسوا الخطة الاستراتيجية للتعليم و الخطة التنفيذية للمحافظة و طاولة الاجتماعات هتنور بهم كل شهر وكل واحد يعرض اللي قدر ينفذه ايه من خطته، وايه اللي مقدرش ينفذه، وليه مقدرش ، والباقي يساعده في تحقيق اعلي معدل تنفيذ، اكيد دا هيبقي في اهم خطوة في تطوير التعليم في مصر .
